Cek…cek…cek…
Ping
telu suba cekceké mamunyi di tembok umahné Pan Kerti, nanging Pan Kerti masi
enu ngantiang pianakne ané kuliah di Buléléng lakar mewali mulih. Uli dugas
satondén majalan ke Buléléng, ia mejanji lakar mulih bin duang minggu.
Nepék
jani suba duang minggu pianakne magedi ke Buléléng. Ento ngaénang liang kenehné
buka jani. Uling neruput Pan Kerti suba metaki-taki ngaénang pianakne darang
nasi, apang nyanan lamun suba neked di jumah ada daranga nasi, sawiréh
kapah-kapah pianakne mulih. Sambilanga ngingetang muan pianakne, Pan Kerti seleg
melutin bawang anggona ngaé jukut pésan marus.
Sedek
iteh megarapan, saget teka kurenane Pan Kerti ané madan Mén suweca sambilanga
musungang bokne ané enu megambahan.
“Bli
adi tumbén semengan beli suba sibuk ngaé dedaran? Lakar ada apa nénénan?”, keto
Mén Suwéca metakon tekén kurenane.
“Adi
nyai tusing inget, pianaké jani lakar mulih”
“Ah
masak jani ya lakar mulih bli?”
“Buin
tandruh dadi nyai, beli kén ngorahang ané lamen benehne”
“Nah
bli yang percaya dogén ngajak beli, sakéwala eda ja bes kanti semangat kéné, ni
tawang beli jam kuda? Ni nu jam telu bli, pulesang ja malu déwéké mani pang segeran
megarapan tur beli tusing gelem cara dugas rainané gara-gara megadang!”
“Nah
tusing, beli tusing ja lakar gelem ulian bangun neruput buka jani! Bayun
beeline nu seger diapin bangun kalijani”
“Pengkung
sajan beli orahin! Deh mai aba yang ja nulungin ngaénang basa apang énggal
pragat!”
Jarum
péndék jamé nujuang di angka kutusé, Pan Kerti ngajak Mén Suwéca enu masi ngaé
darang nasi. Baan legane lakar kecunduk ngajak pianak ané ngoyong di Buléléng,
kanti engsap tekén ubuhan. Kucitne paguék uyut nagih ngamah, sampine masi
mapincer tusing alihanga padang.
Kanti
pragat gegaéne, mara kucit ajak sampine baanga ngamah. Pan Kerti ngeramban
padang di tegalé, Mén Suwéca nuruin kucitne. Suud maang kucit ngamah, Mén
Suwéca nulungin Pan Kerti ngalih padang.
Ceritayang
jani suba tengai, Pan Kerti magegésonan mulihne. Mén Suwéca ané enu nastas
mamahan sampi kekalahin. Pan Kerti suba tusing sabar lakar matemu ngajak
pianakne ané paling keliha totonan.
Suba
teked jumahne, Pan Kerti kauk-kauk ngaukin pianakne
”Tu……..Tu……….Tu……Tu!
dija Putu eni?”
Nanging
tusing ada anak ané mesaut di jumahne. Tuah siapne doén ané ngeruduk nagih
ngamah sawiréh suba tengai.
“Béh
adi kanti kalijani I Putu ondén masi teka, ah cobakin tingalin HP-né malu nyén
nawang ya ada SMS”
Ngénggalang
Pan Kerti ngumbahin batisne, laut ke kamarne nyemak HP. Nanging pianakne ento
tusing ada nge-SMS. Pan Kerti terus ningalin HP-ne, tur celupanga ke kantong
celanane. Ia ngarep-ngarepang pesan apang pianaknne nyak nge-SMS ngorahang enu
di jalan lakar mulih. Sakéwala suba kanti atengan jam ngantiang SMS pianakne,
tusing masi ada teka.
Bin
kesepane sagetan ada sepéda motor munyi magerengan maakin umahne. Pan Kerti
nebak pasti ento pianakne ané teka. Mara jagjagina, tau-taune anak lakar melali
ané ngeliwat. Pocol masi dadine ia nyagjagin.
Uli
joh kelap-kelap Mén Suwéca nyuun saang, misi nadtad manas kuning duang bungkul.
Mejalan sayan paak ke umahne. Suud ngejang saang memunyi ia tekén kurenane.
“Bli
eni maan manas tunyén pas nuduk saang di tegalé. Daar neh bli. Pedalem liu
tampakne posposa tekén pisagané. Jeg sing metari ngalih apa-apa, mara buin raga
mendep beber sajanga kén pisagané”
“Nah
pejang ditu nyanan bang pianaké I Putu naar, beli suba med naar manas”
“Men
kéto yang ker naar abesik nah!”
“Aruuh,
jang ditu pedalem nyanan I Putu teka, apang ada apa kinyukanga”
“Kaden
tuni suba gaénang darang nasi ané jaan”
“Nyai
lebian munyi, depang ditu pejang bang pianaké nyanan!”
“Men
beli tunyén magegésonan mulih, kén ya pianaké?”
“Mirib
nu di jalan”
Pan
Kerti nyaruang ngideng-ngindeng apang tusing sesek, sakéwala ia suba edot gati
ketemu ngajak pianakne. Uli di paon Mén Suwéca ngaukin Pan Kerti ngajakin
medaar, nanging Pan Kerti tusing mesaut. Jagjagina lantas kurenané kén Mén
Suwéca. Kanti ngelemes Mén Suwéca ngorahin kurenane medaar.
“Éh
bli! Suba tengai medaar malu nyanan kumat sakit mag beline gedé gaéné. Nyanan
buin itungang pianaké!”
“Nah
medaar suba maluan, beli ondén Makita medaar”
Nyasan
sanja langité nyasan ngulemang. Sawetara jam telu, HP-ne Pan Kerti mamunyi
ngering. Lega pesan kenehne né jani ada télpun. Mara tingalina ento télpun uli
pianakne. Angkata lantas télpuné ento. Uli télpuné ento pianakne jani ngorahang
kasujatiane, lakar mulih apa tusing. Sagetan uli kaja kauh ujané bales makuwug,
ketimpalin munyin klepég gedé.
Olih:
I Putu Supartika
0 comments:
Post a Comment