Ngiring Mapuisi

Olih: I Putu Supartika

Ngiring mangkin sareng-sareng mapuisi. Krana sangkaning puisi i raga liang, sangkaning puisi i raga makedékan, lan sangkaning puisi taler i raga masawitra leket. Puisi taler ngawinang urip i raga tenang, ngicalang strés, lan puisi prasida kanggén jalaran ngicalang sebet.

Mawit saking ngeripta puisi i raga prasida ngawetuang isin idep i ragane. Napiké sedih, bagia, tresna, miwah rasa jengah. Ri kala ngarepin masalah, sampunang banget anggéna pikobet, ngiring ubadin lan arepin masalah punika antuk puisi. Ambil kertas akebésan, pulpén utawi pénsil, raris kawitin ngripta puisi, medalang sekancan pikobet sané wénten ring déwéké. Sampunang kimud. Yén sampun sekadi punika, jeg pasti pikobet sané wénten ring déwéké pacang ilang, kenehé sané baat pacang kerasanin ying. Ketimbang i raga ngenehang sekancan pikobet punika, panadosne nénten ja pacang becik, indiké punika pacang ngawetuang pinyungkan-pinyungkan sekadi stréss lan manados struk. Becikan medalang pikobet punika ring kertas lan dadosang puisi.

Ri kala sepi kerasa ngutgut déwéké, ngiring ubadin antuk puisi. Dadosang puisi punika pinaka sawitra ri kala nyalanin sepi. Sampunang baanga sepi punika kantos ngalahang déwék i raga. Krana ulian puisi i raga sida ngubain sepi.

Kénten taler ri kala nedeng ngerasayang tresna, méweh pacang i raga nelatarang sapunapi rasa tresna punika. Tuah puisi sané sida ngewakilin rasa tresna punika. Ulian rasa tresna, pacang ngamedalang sekancan kruna-kruna sané becik lan luwih, sané méweh karuruh ring anak sané nénten ngerasayang tresna. Kruna-kruna punika jalan susun mangda manados puisi, pastika puisi sané kakaryanin pacang becik.

Sejabaning anggén ngubadin rasa sebet lan jengah, nimpalin rasa liang lan sepi, puisi punika taler pinaka jalaran sané kaanggén ngalestariang basa lan budaya. Puisi kasengguh pinaka jalaran ngalestariang basa, krana puisi punika kawangun olih kruna-kruna, lan kruna-kruna punika wantah basa sané kaanggén pinaka alat komunikasi ring kauripané sarahina-rahina. Ulian ngeripta puisi nénten ja kerasa i raga sampun sareng-sareng ngalestariang basa. Punika taler puisi kasengguh pinaka jalaran anggén ngalestariang budaya, krana akéhan puisi punika embas saking budaya sang sané ngawi. Ri kala ngripta puisi punika pastika kadasarin antuk budaya sang sané ngawi, punika sané ngawinang puisi pinaka jalaran anggén ngalestariang budaya.

Ring sang sané wau utawi kantun melajah ngeripta puisi, sampunang merasa kimud, napi malih lek-lekan. Rarisang kembangang idé-idé sané anyar ri kala ngripta puisi. Puisi sané kakawi punika nénten ja selaminé harus nganggén basa sané madaging majas, yadiastun basannyané saderhana, nanging durung ja menjamin daging puisiné punika saderhana. Bisa-bisa puisi sané saderhana punika madaging makna utawi tetujon sané lebih.

Krana akéh pisan kawigunan puisi punika, ngiring ngawit mangkin i raga sareng-sareng makarya puisi. Yadiastun puisi sané kakaryanin punika wantah iseng-isengan, nanging saking iseng-isengan punika pacang ngawetuang pikenoh sané akéh. Nénten ja ngawetuang pikenoh sané mabuat ring sang pengawi kémanten, nanging taler ngawetuang pikenoh ring anak lianan.

           

                                                                                                Singaraja, Oktober 2014