Patapan Padi

Olih: I Putu Supartika

Manumadi dados manusa nénten ja tegep yén durung malaksana sané becik. Duaning i raga embas ka mercapada wantah ngaruruh karma sané becik, mangda polih sané mawasta suarga, molih kadirgayusan, lan bagia.

Silih sinunggil parilaksana sané becik inggih punika nénten ja sombong. Krana sakadi sané sampun ketah kauningin, ulian sombong punika ngranayang metu kajelékan sané lianan. Kajelékan sané metu punika luiré nyatcadin timpal, ngaku paling ririh, paling duweg, paling bisa, nganggep anak lianan tuna, nénten ngargain anak lianan, miwah kajelékan sané lianan. Sombong punika taler musuh i raga urip ring jagaté sané patut ka pademang, patut kalebur mangda nénten ngawetuang pikobet ring kauripané. Ulian sombong, i raga pacang musuhin nyama braya, nénten wénten sané pacang rungu tekén i raga.

Duaning sombong punika nénten becik, lan akéh ngawetuang pikobet-pikobet sané ngarugiang, ngiring mangkin pademang kasombongané punika. Lebur saking déwék i raga mangda nénten ngawetuang pikobet. Asapunapiang ngalebur kasombongané punika? Silih sinunggil caranipuné, inggih punika nuutin patapan padi. Matingkah kadi i padi sané madaging isi.

I raga sareng sami pastika sampun uning ring padi. Mangkin saking padi punika i raga patut malajah kabecikan, malajah kaluwihan. Sapunapiang i raga malajah saking padi? Yadiastun padi punika tuah tetanduran nanging yéning i raga ngaresepang, i raga pacang polih paplajahan sané luwih saking i padi. Yén  padi punika puyung, sinah padi punika pacang tajeg, jegjeg nantangin langit. Sakéwala yén padi punika sampun madaging isi, padi punika pacang nguntul. Sayan madaging isi, sayan nguntul padi punika. Nika nyiriang padi punika nénten ja sombong, nénten angkuh. Sané mangkin, ngiring tingkah padi punika dadosang sasuluh. Dadosang dasar mangda i raga nénten ja sombong ring kauripané.

Yén i raga wikan, sampunang kawikanané punika anggéna palalian. Sampunang kawikanané punika sombonganga. Sampunang sentokanga yéning nénten wénten gunane. Yén kawikanan punika kaperluang, jalan anggén, sakéwala sampunang bes kaliwat nganggén kaluwihan punika. Jalan tiru tingkah padi punika. Nyansan misi nyansan nguntul. Dadosang meka ring déwéké. Nyansan wikan, nyansan ngandapang raga, punika sané pinih becik. Boya ja nyansan wikan, nyansan negehang raga. Yén i raga negehang raga sangkaning kawikanan punika nénten ja becik. Jelék kacingak olih anak lianan.

Taler saking padi i raga malajah kaluwihan. Yadiastun padi punika mentik ring enduté, nanging nénten ja ngawinang i padi punika nyelsel. Sangkaning i padi punika mentik ring enduté, padi punika sanget maguna. Krana i padi punika ngasilang jijih. Jijih kaselip kadadosang beras. Saking beras punika i raga sida ngajeng sabilang wai. Nénten ja maguna ring i manusa kémanten, taler maguna ring beburon minakadi i kedis perit.

Yén saihang ka déwéké, sinah sampun maartos dalem. Yadiastun i raga lekad utawi embas ring genahé sané nénten ja luung, yadiastun i raga embas saking rerama sané tunaan arta brana, sampunang indiké punika anggéna pariselsel. Ngiring tulad i padi. Yadiastun ipun mentik ring enduté, nanging i padi akéh mapitulung, satmaka ipun nyelametang urip i manusa lan i buron sakadi kedis lan banténg.

Ngawit mangkin ngiring sareng-sareng malajah saking i padi. Sampunang nyombongang déwék, sampunang nganggep anak lianan tunaan tekéning i raga. Punika taler sampunang nyelselin déwék dipradéné i raga embas nénten ja mujur. Yén i raga sami nyak nulad patapan i padi, sampun janten idup i raga pacang bagia.

Singaraja, 29 Novémber 2014