Panglimbak Puisi Bali Anyar ring Galahé Mangkin

Olih: I Putu Supartika

Yén mawicara ngenénin indik Puisi Bali Anyar, sampun janten i raga taler pacang mawicara ngenénin indik sastra Bali Anyar. Duaning Puisi Bali Anyar inggih punika sinalih tunggil wacakan Sastra Bali anyar sané marupa kekawian puisi sané nganggén basa Bali, lan nénten kaiket olih uger-uger sekadi sané ngiket Puisi Bali Purwa (sloka, palawakya, kekawin, pupuh, miwah sané tiosan), lan sang sané ngawi punika bébas ngawetuang kawikanannyané ring sajeroning ngolah Basa Bali mangda kakantenang becik ring sajeroning reriptan ipuné, napiké patut nganggén majas, miwah nganggén permainan kata.

Ring galahé mangkin, panglimbak Puisi Bali Anyar, sampun sayan-sayan ngakéhang uatwi sampun jimbar, yadiastun sekadi sané sampun ketah kauningin akéh para alit-alité, wiadin para wargané sané meneng ring Bali utamannyané sané meneng ring kota-kota nganggén Basa Indonésia. Panglimbak Puisi Bali Anyar sané sampun sayan jimbar punika sida kauningin saking akéhnyané para pangawi-pengawi Puisi Bali Anyar sané embas ring galahé mangkin. Yadiastun ring kota-kota akéh anaké sané nganggén Basa Indonésia ri kala mabebaosan sareng anak lianan, nanging kantun wénten anak sané urati tekéning Basa Bali malarapan antuk ngripta Puisi Bali Anyar. Indiké punika pinaka silih sinunggil cihna Basa Baliné kantun kaangep lan kantun kajungjungang ring sajeroning kauripan, lan Satra Bali Anyaré polih genah ring masyarakat.

Dumun para pengawi Puisi Bali Anyar wantah akedik lan sida antuk kakeniang wacakan duéné. Krana dumun akéhan para pengawi Sastra Baliné sané ngawi Sastra Bali Purwa. Napimalih ri kala Puisi Bali punika ngawit embas ring bali, wantah akidik pengawi Puisi Bali Anyar. Nanging nyansan lami, nyansan akéh taler para pengawi Puisi Bali Anyar sané embas. Silih sinunggil pengawi Puisi Bali Anyar sané produktif ri kala awal panglimbak Puisi Bali Anyar ring Bali inggih punika I Madé Sanggra, taler I Nyoman Manda. Ipun pinaka pamucuk Sastra Bali Anyar utamine Puisi Bali Anyar. Lan taler ketah kauningin Bapak I Nyoman Manda wantah pengawi Puisi Bali Anyar sané kantun produktif ngantos mangkin yadiastun yusanipuné sampun nénten wimuda malih.

Sayan ngelimbak aab jagaté, sayan ngelimbak taler Puisi Bali Anyar punika. Ngelimbaknyané Puisi Bali Anyar punika nénten ja lémpas saking kiprah para pengawi Puisi Bali Anyar sané lawas utawi sénior sané sampun ngamedalang makudang-kudang cakepan pupulan Puisi Bali Anyar wiadin sané wau embas utawi kantun wimuda. Sané lawas utawi sénior lan kantun ngeripta kakawin Puisi Bali Anyar minakadi I Nyoman Manda, IGG Djelantik Santha, I Madé Suarsa, IDK Raka Kusuma, miwah para pengawi sénior lianan. Lan sané wau embas minakadi Tudékamatra (I Putu Gedé Raka Prama Putra), I Madé Suar-Timuhun, Ni Madé Ari Dwijayanthi, lan para pengawi lianan sané kekawian Puisi Bali Anyar ipuné munggah ring koran utawi majalah sané madaging rubrik Basa Bali.

Panglimbak Puisi Bali anyar sané sampun sayan-sayan jimbar punika taler kasarengin antuk panglimbak media masa (koran utawi majalah) sané madaging rubrik Basa Bali. Punika taler pinaka vitamin sané sida ngawinang Puisi Bali Anyar punika sayang ngelimbak.

Dumogi ngantos kapungkur wekas Puisi Bali Anyar punika sayan ngelimbak lan ajeg, sumangdané Basa Baliné taler tetep ajeg, duaning Puisi Bali Anyar punika pinaka sinalih tunggil sané ngawinang Basa Baline tetep ajeg.

Singaraja, September 2014