Panglimbak Téater Modérn ring Bali

Olih: I Putu Supartika

Panglimbak seni ring galahé mangkin nénten dados palasang saking panglimbaknyané téater modérn. Téater modérn puniki wantah silih sinunggil kesenian sané ketah kabaos drama modérn yening rereh artosne saking krunannyané. Nanging téater modérn punika taler kabaos pertunjukan sané nganggén piranti modérn, minakadi geraknyané, pengiring nyané miwah papayasannyané sané sampun modérn.

Ring Bali, yadiastun saking uni sampun ketah antuk téater tradisionalnyané sané sampun maakah, nanging kawéntenan téater modérn taler nénten kalah saking téater tradisional. Panglimbak téater modérn ring sajebag jagat Bali ring galahé mangkin sampun sayan-sayan jimbar. Indiké puniki prasida kakantenang saking akéh nyané sanggar, komunitas-komunitas, wiadin paguyuban-paguyuban sané embas lan ngusung téater modern puniki. Ngawit saking tanggu kangin kantos tanggu kauh, lan saking tanggu kaja ngantos tanggu kelod jagat Bali puniki sampun akéh sanggar, komunitas-komunitas wiadin paguyuban teater modern sané embas. Para perintis sanggar, peguyuban, wiadin komunitas punika ngawit saking sisia SMP, SMA, ngantos mahasiswa sané kantun ngaruruh ajah-ajah. Taler wénten masih saking masyarakat umum sané dados perintis embasnyané komunitas, sanggar, utawi paguyuban téater modérn puniki.

Akéhnyané kawéntenan sanggar, paguyuban, wiadin komunitas téater modérn sané embas ring Bali, ngawinang téater modérn sayan maurip ring Bali. Punika taler acara-acara sané ngusung téater modérn sampun sayan akéh kalaksanyang. Nénten ja rikala pacentokan kémanten, taler wénten masih silih sinunggil sanggar, paguyuban, wiadin komunitas sané ngelaksanayang peméntasan téater modérn puniki pinaka hiburan.

 Silih sinunggil, genah ring Bali sané kantun ngajegang téater modérn inggih punika Buléléng. Indiké puniki prasida kauningin saking acara sané kalaksanayang olih UKM Téater Kampus Seribu Jendéla UNDIKSHA-Singaraja. Acara sané kalaksanayang inggih punika parade téater sané mamurda “Parade Téater Muda Bali Utara” sané tetujonnyané nguripang téater modern ring Bali, khususne ring Buléléng lan ngaraketang pasawitran komunitas, sanggar, wiadin paguyuban sané wénten ring Buléléng.

Acara paradé téater puniki kalaksanayang ngawit saking rahina Buda pinanggal kaping 4 Juni ngantos pinanggal kaping 7 Juni 2014 sané sampun lintang, ring wantilan Kampus Bawah UNDIKSHA-Singaraja. Parade puniki kamiletin olih kutus sanggar, paguyuban, wiadin komunitas ring sajebag Buléléng.

Komunitas, sanggar, wiadin paguyuban sané ngamiletin parade puniki minakadi Komunitas Puntung Rokok (UNDIKSHA) sané méntasang naskah Partai Bodius reriptan Wiwit Nugroho, Paguyuban Tebu Tuh (UNDIKSHA) sané méntasang naskah Aduh reriptan Putu Wijaya, Komunitas Cemara Angin (UNDIKSHA) sané méntasang naskah Prét...Prot reriptan Ilham Yusardi, Téater Ilalang (SMA Lab. UNDIKSHA) sané méntasang naskah Raib reriptan Gus Martin, UKM Téater Kampus Seribu Jendéla sané méntasang naskah Petang di Taman reriptan Iwan Simatupang, Anonim (UNDIKSHA) sané méntasang naskah Ringsek reriptan Nanoq Da Kansas, Téater Culik Api (SMPN 1 Sawan) sané méntasang naskah Aib reriptan Ni Ketut Ayu Puspita, lan Téater Galang Kangin sané méntasang naskah Salah reriptan Téater Galang Kangin.

Parade Téater Muda Bali Utara puniki wantah bukti, téater modern sampun ngalimbak ring Bali. Ngalimbaknyané téater modérn ring Bali puniki pacang ngawinang sayan ngakéhang wacakan seni sané maurip ring Bali, lan Bali puniki pacang sayan kasub antuk keseniannyané punika.

                                                                                                                        Singaraja, Juni 2014